૮. આરતી

જય સદગુરુ સ્વામી, પ્રભુ જય સદગુરુ સ્વામી;

સહજાનંદ દયાળુ (2), બળવંત બહુનામી. જય...

ચરણસરોજ તમારાં, વંદું કર જોડી; (2)

ચરણે શીશ ધર્યાથી (2), દુઃખ નાખ્યાં તોડી. જય...

નારાયણ નર ભ્રાતા, દ્વિજકુળ તનુ ધારી; (2)

પામર પતિત ઉદ્ધાર્યા (2), અગણિત નરનારી. જય...

નિત્ય નિત્ય નૌતમ, લીલા કરતા અવિનાશી; (2)

અડસઠ તીરથ ચરણે (2), કોટિ ગયા કાશી. જય...

પુરુષોત્તમ પ્રકટનું, જે દર્શન કરશે; (2)

કાળકર્મથી છૂટી (2), કુટુંબ સહિત તરશે. જય...

આ અવસર કરુણાનિધિ, કરુણા બહુ કીધી; (2)

મુક્તાનંદ કહે મુક્તિ (2), સુગમ કરી સિદ્ધિ. જય...